連詩雅母女齊感冒 囡囡燒至40度嚇到喊

近日流感肆虐，加上天氣寒冷，染病機率大增。藝人連詩雅（Shiga）去年7月為陳家樂誕下女兒陳星頤（Camila），沒料到囡囡首個農曆新年，母女兩人於大年初一齊齊病倒發燒，囡囡更燒到40度，立即送往急症。

連詩雅日前在社交網詳述情況，並上載囡囡已回復精靈的片段。她寫道︰「消失的新年…今年年初一一起身，我同個女一齊發燒，我就38.7度，我個女就39.2度。雖然話BB發燒，好小事，可能出牙，長高之類之類，不過佢人生第一次發燒，加上我都幾肯定應該係我傳染個女，因為我之前嗰日已經開始咳得好勁。雖然我都有同佢保持距離，但係都係避唔過。同日嘅下午佢直頭燒到40度，我已經嚇到不停喊。陳生9秒9車我哋去急症，好彩檢查唔係流感，只係普通感冒，返到屋企食藥。」

連詩雅又指自己和囡囡好像昏迷了三天，每天起來就是食藥和睡，「最後我哋喺屋企渾渾噩噩，咁就過咗個新年，呢兩日先開始回魂，所以話新嘅一年乜都係假，總之就身體健康、開開心心、食得瞓得，就已經好感恩，今日係初七，祝大家人日快樂啦！#咁就喺屋企過左7日#辛苦陳生照顧我哋兩個#邊度都冇得去#希望我哋一家今年都健健康康#大家都心想事成#開心最緊要#遲來的新年快樂#阿女終於精神返」。