馬國明過大禮夠排場 湯洛雯：有少少呆咗

視帝馬國明將與同為藝人的湯洛雯於下月在東南亞舉行婚禮，婚禮只宴請雙方親友合共80人，不過兩人都依照傳統習俗籌備婚禮，昨日（29日）湯洛雯在社交平台貼上過大禮的相片，馬國明出手相當重，連湯洛雯都忍不住說：「嗰日係有少少呆咗！」

湯洛雯在社交平台貼上過大禮的相片，兩人依照傳統習俗籌備婚禮，相中所見，過大禮的物品連一張兩層高的枱都擺唔晒，鮑參翅肚樣樣都有，而且份量更加相當大，不過最吸睛一定是金器，共有四對龍鳳鈪、兩條金豬鍊和兩套頸鍊、耳環和手鈪套裝，其中有兩對更加是流星錘龍鳳鈪，湯洛雯忍不住說：「咁大個女第一次見到好似流星錘咁嘅龍鳳鈪，仲有好多隻豬豬，好靚好壯觀。」

嫁女餅足足有四大盤，湯洛雯笑說：「啲餅有成四大盤多到食唔晒派唔晒，而且啲盤聽講係傳承落嚟，好意頭好意頭。」湯洛雯還說：「又一項完成！原來過大禮係咁複雜，嗰日係有少少呆咗，不過好多謝馬生嘅疼愛，同各位兄弟姊妹嘅幫手。任務順利完成。」湯洛雯分別TAG有兄弟姊妹的名字，當中包括有林子善和黃家樂夫婦，相信到時他們將會擔任兄弟團。