港大生心懷警察夢 子承父業投身警隊

警察學院今期共有28名督察和127名警員結業並加入警隊。年僅25歲的畢業督察朱健樂獲得施禮榮盾、榮譽警棍及警務處處長學業成績優異證書。他表示，其父親是有三十多年資歷的警員，但在2019年修例風波前已退休，所以遺憾未能為警隊付出，「佢正正就係喺『黑暴』之前退休，我細細個受佢熏陶，耳濡目染底下都有一個警察夢，一直都有想做警察嘅念頭。我希望追隨我爸爸嘅警隊步伐，可以完成佢未完成嘅警隊之路。」

朱健樂分享道，其父親曾駐守西九反黑及重案組，主要從事刑事偵查工作，大多晚上執行職務。當時自己是小學生，有時上午明明看到父親在房間裏睡覺，但同時在電視中見到父親在押解罪犯，令他感到疑惑：「當時覺得好得意，點解爸爸明明噚晚返咗工，點解喺電視（出現），爸爸唔係做演員㗎噃！」

後來，他才明白警務人員不辭勞苦、英勇執法及維持治安，讓一般市民可以安心在晚上熟睡，「呢個令我細細個就覺得，警察係好偉大、好有使命感嘅工作。」

在修例風波期間，朱健樂在香港大學修讀工商管理學士學位，主修會計及財務。2019年修例風波爆發，他在港大感受到不少同學、朋友對事件有熱烈意見及感受，「電視上面見到好多令人唔開心嘅畫面。」當年，社會上有一股仇警情緒，大學生參與運動就衝昏了頭腦：「同學之間爭執就少不免一定會有，爭執嘅並唔係爭執立場，而係爭執緊有冇需要因為政治立場而放棄友誼。無可避免人各有志，大家有自己追隨嘅嘢，我都好尊重佢嘅自由。」

「加入警隊希望可以避免呢啲事件發生，避免再有咁大型嘅警民衝突，大家都希望香港由亂到治，由治及興。」朱健樂2020年獲頒工商管理學（榮譽）學位，其後任職銀行助理客戶經理。他希望畢業後擔任刑偵探員，運用自己學歷經驗，協助偵破各類金融詐騙案件。