頭暈伯伯獲暖心老師代付的士費送回家　 女兒網上尋人盼道謝

天氣炎熱，容易中暑頭暈不適，日前就有一位伯伯在坑口明德商場附近突然頭暈、心口痛，便坐在地上稍作休息，正當伯伯不知所措之際，一位好心小學職員上前幫忙，問伯伯是否需要叫救護車或幫忙聯絡家人，又俾紫花油佢聞，最後更給伯伯$100送他上的士回家。伯伯的女兒得知事件後，遂在社交網站上發帖尋人，希望找到那位好心女士，並將錢還給她。

伯伯的女兒在Facebook群組「將軍澳主場」發文寫道：「言小姐？炎小姐？嚴小姐？我好想親自多謝你！好想當面還返$100俾你，好人一生平安，多謝你！爸爸話嗰時你扶佢起身，仲問佢可唔可以行幾步路，又話可以入去佢間學校大堂坐住休息一下，等個女嚟接走。但爸爸實在唔舒服，佢話同你講想返屋企……而你亦用咗最快可以幫爸爸嘅方法截車，我聽到爸爸返嚟同我講，我好感動，好多謝你咁幫我爸爸！你俾我睇到香港仲有好多大善心、有愛心嘅人！」